كشفت آية، شقيقة مطرب المهرجانات مسلم، عن كواليس خلافها مع زوجته السابقة يارا، مؤكدة أن غياب الحزم من البداية كان سببًا رئيسيًا في تصاعد الأزمة.
وقالت خلال لقائها في برنامج “مساء الياسمين” مع الإعلامية ياسمين الخطيب: اللي خلاني أطلع أتكلم على السوشيال ميديا هو إن مفيش حزم حصل من البداية، كنت بشتكي لأخويا ومكنش بيحل، وكان بيقولي مش عارف أتصرف.”
وأوضحت آية أنها لم تحضر حفل زفاف شقيقها بسبب الخلافات مع يارا، قائلة: هي غلطت فيا وفي والدتي، ومع ذلك راحت الفرح غصب عني، ومسلم جابلها عربية خاصة علشان لو مكنتش هتحضر، محدش فينا كان هيحضر، لأننا كنا رافضين الجوازة دي من الأساس.”
وأضافت: هي مش شبهنا، والأصول عندنا الست مهما حصل من جوزها مبتردش الإساءة بالإساءة، لكن كانت بتطلع تتعامل كأنها هو، وهو مكنش بيرد، ومش عارفة ليه واقف في مكانه مش بيتحرك.
واستكملت حديثها قائلة: “قدرش أقول إنه بيحبها، هو كان بيحب اللي قبلها، كانت محترمة، بحسه مسحور لأن اللي بيحصله مش طبيعي.”
كما أشارت إلى أن شقيقها كان في علاقة سابقة مع فتاة تُدعى ميكا، وكانت تحاول دعمه للعودة إليها: لما كنت بسمع إنهم فسخوا الخطوبة، كنت بحاول أرجعه لميكا، لأنه كان بيعشقها، ولما كانت بتغلط كان بيقولها بلاش تتعاملي مع أهلي كده، لكن مع يارا مش قادر عليها.
أعمال مسلم
من جانبه، اعتذر مسلم مؤخرا، لنقيب المهن الموسيقية مصطفى كامل، وذلك بعد اتهامه له بعدم مراعاة حالته الصحية ووقفه عن الغناء دون استدعائه، وقال مسلم عبر ستوري حسابه الرسمي بموقع إنستجرام: الفيديو ده بقدم فيه اعتذاري للنقابة والنقيب مصطفى كامل، ولو كنت دعيت عليك أو حاجة ده بسبب إني شاب لوحدي، وكنت تعبان وملقتش حد يقف جنبي في تعبي، وبيتي اتخرب في الفترة اللي إتوقفت فيها عن الغناء.
أزمة مسلم مع مصطفى كامل والموسيقيين
وفي وقت سابق، تصاعدت أزمة مسلم بعد منشور كتبه عبر حسابه الرسمي على إنستجرام من داخل المستشفى، أعلن إصابته بانسداد في أحد شرايين القلب، متهمًا نقيب المهن الموسيقية مصطفى كامل بأنه السبب في ما يمر به من تدهور صحي ونفسي، وقال مسلم في منشوره: حسبي الله ونعم الوكيل، الصبح اتسد ليا شريان في القلب، وبالليل أنا ومراتي بنموت، حرفيًا شوفت الموت، وكل ده بسبب ظلم ناس معينين، وأنتم عارفينهم.
